هذا الموضوع له علاقة بقسم : للنساء فقط
المرايا صديقة المرأة وعنصر مهم فى كل بيت ، فإلى جانب إستخدامها التقليدى لكل الأسرة فى أن كل واحد يشوف مظهره ، هي كمان جزء من الديكور، ومن الأثاث كمان ( الشبابيك والطربيزات والدواليب ... ) خلينا نشوف إزاي ممكن نستخدم المرايا بشكل يخدم ديكور ومساحة الشقة ؟
بصوا يا جماعة :
- لو فيه أوضة سقفها واطي أو ضيقة شوية ، هيكون كويس أوى لو نلزق مراية على الحيطة أو فى السقف ، ده بيدى شعور بالإتساع .
- ممكن أوى نحط مراية فى مدخل باب الشقة ، أولا حتلفت نظر اللي داخل عن أنه يشوف أي حاجة جوه البيت ، من ناحية ثانية كل اللي نازل يقدر يتمم على هندامه فيها ، وأصلاً فكرة المرايا عند الباب ظهرت فى الدول الغربية اللي جوها بارد ، لأنهم وهما داخلين بيخلعوا الجاكت ويعلقوه ، وهما خارجين بيلبسوه ، فكان لازمهم مراياعلى الباب .
- مراية الحمام ومراية التسريحة لازم يكونوا من أحسن الأنواع ، كمان الإضاءة بتاعتهم تكون كافية جداً .
- ممكن تشوفوا المرايا بتتكسر بسرعة وده حقيقي ، خصوصاً مرايات الأبواب ، وعشان ده ما يحصلش يفضل لزق المرايات بدل ما يتعمل فيها ثقوب للتركيب ، كمان نحط المرايا بعيد عن مفاتيح الكهرباء .
- لو قررتوا تلصقوا مراية على حيطة فالموضوع بسيط وممكن تعملوه بنفسكم ، هاتوا لوح خشب تثبتوه كويس على الحيطة وادهنوه سيلكو ، والصقوا عليه المراية ، كده تمام .. صالات ومعارض كبيرة بتلصق مراياتها بالطريقة دى ...
أتمنى لكم حياة سعيدة وراحة بال وبيت جميل وديكور مميز .
0 التعليقات:
إرسال تعليق